თბილისის სახელმწიფო სამედიცინო უნივერსიტეტში 2022 წლის 3 ოქტომბრიდან 24 დეკემბრის ჩათვლით გაცვლითი პროგრამით, სტაჟირების გასავლელად, ვენის (ავსტრია)  სამედიცინო უნივერსიტეტის სტუდენტები: გრიშკა კრისტიან ჯენის ჰეიმრატი და თამინა ლოლა კორენი იმყოფებოდნენ.

აღსანიშნავია, რომ სტუდენტებმა სტაჟირება თსსუ-ის რამდენიმე დეპარტამენტში გაიარეს.

ვენის სამედიცინო უნივერსიტეტის სტუდენტი გრიშკა კრისტიან ჯენის ჰეიმრატი სტაჟირებისთვის იმყოფებოდა თვალის სნეულებათა დეპარტამენტში; ყელ-ყურ-ცხვირის სნეულებათა დეპარტამენტში; ნერვულ სნეულებათა პროპედევტიკის და ტოპიკური დიაგნოსტიკის დეპარტამენტში, ასევე მეანობა-გინეკოლოგიის დეპარტამენტში.

„ჩემთვის უმნიშვნელოვანესია, რაც შეიძლება მეტ პაციენტთან მქონდეს კომუნიკაცია. ეს საუკეთესო საშუალებაა მიღებული ცოდნის პრაქტიკაში განხორციელებისთვის. ორ წელიწადში ექიმი ვიქნები და მსურს, რაც შეიძლება მეტი გამოცდილება დავაგროვო. თბილისში მუშაობა საინტერესო გამოცდილებაა ჩემთვის, ვინაიდან აქ ვეცნობი მკურნალობის სხვადასხვა მეთოდს. გარდა ამისა, მოხიბლული ვარ საქართველოთი, ძალიან ლამაზი და სტუმართმოყვარე ქვეყანაა“, - ამბობს გრიშკა კრისტიან ჯენის ჰეიმრატი.

მეორე ავსტრიელმა სტუდენტმა თამინა ლოლა კორენმა სტაჟირება გაიარა თსსუ-ის პედიატრიის #2 დეპარტამენტში; ნერვულ სნეულებათა პროპედევტიკის და ტოპიკური დიაგნოსტიკის დეპარტამენტში; ანესთეზიოლოგიის და რეანიმატოლოგიის დეპარტამენტში.

„საქართველოში სტაჟირება ჩემთვის საინტერესო გამოცდილებაა. თბილისის სახელმწიფო სამედიცინო უნივერსიტეტის სხვადასხვა დეპარტამენტში ვესწრები საინტერესო მანიპულაციებს, ოპერაციებს, ვეცნობი სხვადასხვა კლინიკურ შემთხვევას. ყველაზე საინტერესო იყო ჩემთვის ანესთეზიოლოგთან მუშაობა. მეც მომავალი ანესთეზიოლოგი ვარ და ჩემთვის განსაკუთრებულად კარგი გამოცდილება იყო ანესთეზიოლოგის ასისტირების პროცესი“, - ამბობს თამინა ლოლა კორენი.

სტუდენტების საქმიანობას საქართველოში ხელმძღვანელობდნენ თბილისის სახელმწიფო სამედიცინო უნივერსიტეტის: თვალის სნეულებათა დეპარტამენტის ხელმძღვანელის მ/შ, ასოცირებული პროფესორი ნინო კარანაძე; პედიატრიის #2 დეპარტამენტის ხელმძღვანელი, პროფესორი ეკატერინე უბერი; ყელ-ყურ-ცხვირის სნეულებათა დეპარტამენტის ხელმძღვანელი, პროფესორი ნატო ნაკუდაშვილი; ნერვულ-სნეულებათა პროპედევტიკისა და ტოპიკური დიაგნოსტიკის დეპარტამენტის ხელმძღვანელი, პროფესორი მაია ბერიძე; მეანობა-გინეკოლოგიის დეპარტამენტის ხელმძღვანელი, პროფესორი ნიკოლოზ-ნუკრი კინტრაია; ანესთეზიოლოგიისა და რეანიმატოლოგიის დეპარტამენტის ხელმძღვანელი და პირველი საუნივერსიტეტო კლინიკის გენერალური დირექტორი, პროფესორი ლევან რატიანი.