დეკანის გზავნილი

 

XXI საუკუნეში, მსოფლიოს წამყვან ქვეყნებში, საზოგადოებრივი ჯანდაცვა ერთ-ერთი ყველაზე რეიტინგული და მნიშვნელოვანი მიმართულებაა მედიცინაში. ჯანდაცვის სფეროში მიმდინარე ცვლილებები გადამწყვეტ როლს ანიჭებს დაავადებათა კონტროლისა და პრევენციის, მოსახლეობისათვის უსაფრთხო საცხოვრებელი და სამუშაო გარემოს შექმნისა და ცხოვრების ჯანსაღი წესის დამკვიდრების საკითხებს. 

თბილისის სახელმწიფო სამედიცინო უნივერსიტეტი ითვალისწინებს რა საქართველოს ჯანდაცვისა და განათლების სისტემაში მიმდინარე რეფორმებს, წარმატებით ახორციელებს სპეციალისტთა მომზადების ოპტიმიზაციას და მათ ხარისხობრივ და რაოდენობრივ რეგულირებას. ყოველივე ეს ხორციელდება საგანმანათლებლო პროგრამების საერთაშორისო და დარგობრივ სტანდარტებთან შესაბამისობაში მოყვანით და  თანამედროვე მოთხოვნების შესაბამისი კადრის მომზადებით. 

საზოგადოებრივი ჯანდაცვის ფაკულტეტზე მოღვაწე  პროფესორ-მასწავლებლებს  შორის არიან დარგის წამყვანი სპეციალისტები, სხვადასხვა საერთაშორისო ორგანიზაციების ექსპერტები და კონსულტანტები. მათ მიერ შექმნილი სახელმძღვანელოებითა და სამეცნიერო შრომებით ბევრი ღირსეული სპეციალისტი და მეცნიერი აღიზარდა. 

საზოგადოებრივი ჯანდაცვის ფაკულტეტზე ხორციელდება სამივე საფეხურის საგანმანათლებლო პროგრამა და ხდება ბაკალავრების, მაგისტრებისა და დოქტორების მომზადება. ფაკულტეტის აკადემიური პერსონალი მონაწილეობს დიპლომისშემდგომი უწყვეტი პროფესიული განათლების პროგრამების განხორციელებაში.  

საზოგადოებრივი ჯანდაცვის ფაკულტეტზე აკრედიტებულია: ორი საბაკალავრო პროგრამა „საზოგადოებრივი ჯანდაცვა“ და „საზოგადოებრივი ჯანდაცვა და მენეჯმენტი“  (ფრანგულ მხარესთან ერთად. პროგრამის დასრულების შემდეგ ბაკალავრი იღებს ორ დიპლომს - ქართულს (გაცემულს საქართველოს კანონმდებლობის შესაბამისად) და ფრანგულს (გაცემულს საფრანგეთის კანონმდებლობის შესაბამისად) და 4 სამაგისტრო პროგრამა („საზოგადოებრივი ჯანდაცვა“, „ეპიდემიოლოგია“ „გარემოს მედიცინა“, „ჯანმრთელობის ხელშეწყობა, ჯანმრთელობითი განათლება“).

ფაკულტეტს აქვს საერთაშორისო კონტაქტები საფრანგეთის, დიდი ბრიტანეთის, თურქეთის, ბალტიისპირეთის და ამიერკავკასიის ქვეყნების უნივერსიტეტების შესაბამის ფაკულტეტებთან და საზოგადოებრივი ჯანდაცვის სკოლებთან.  ხორციელდება სტუდენტების სტაჟირების პროგრამები  უცხოეთის უნივერსიტეტებში.

სწავლების პირველი საფეხურის (ბაკალავრიატის) დასრულების შემდეგ კურსდამთავრებულთა დასაქმების სფერო არის ოკუპირებული ტერიტორიებიდან დევნილთა,   შრომის, ჯანმრთელობისა და სოციალური დაცვის, საქართველოს გარემოს დაცვისა და სოფლის მეურნეობის სამინისტროების, ადგილობრივი თვითმმართველობის ორგანოების დაქვემდებარებაში მყოფი საზოგადოებრივი ჯანმრთელობის დაცვის უზრუნველყოფასთან დაკავშირებული სამსახურები. აგრეთვე, საკუთრების სხვადასხვა ფორმის სამკურნალო-პროფილაქტიკური, სამეცნიერო-კვლევითი დაწესებულებები და ორგანიზაციები, რომელთა საქმიანობა დაკავშირებულია მოსახლეობის ჯანმრთელობის დაცვასთან, მათ მომსახურებასთან, მენეჯმენტთან და პრევენციული ღონისძიებების გატარებასთან.

სწავლების მეორე საფეხურის (მაგისტრატურის) დასრულების შემდეგ კურსდამთავრებულებს შესაძლებლობა ექნებათ დაიკავონ ზემოხსენებულ სამსახურებში ხელმძღვანელი თანამდებობები, ან განაგრძონ სწავლა დოქტორანტურაში.