„სისტემური, სტანდარტებზე დაფუძნებული, მონაწილეობითი შეფასება უწყვეტი ხარისხის გაუმჯობესების პროექტის ფარგლებში ყირგიზეთსა და ტაჯიკეთში: შედეგები ახალშობილთა მოვლის შესახებ“ – მასშტაბური, საერთაშორისო კვლევა, რომლის ავტორი თბილისის სახელმწიფო სამედიცინო უნივერსიტეტის ნეონატოლოგიის დეპარტამენტის ხელმძღვანელი, პროფესორი ხათუნა ლომაურია და თანაავტორი - საერთაშორისო კვლევითი ჯგუფი, ავტორიტეტულ საერთაშორისო გამოცემაში Journal of Global Health (ტომი 15, სტატია №04162, 2025 წ.) დაიბეჭდა.
სამეცნიერო სტატია ეფუძნება და აფასებს ჯანდაცვის ორგანიზაციის ევროპის რეგიონული ბიუროს მიერ დაგეგმილი ორწლიანი პროექტის შედეგებს, რომლის ფარგლებშიც ყირგიზეთის და ტაჯიკეთის რესპუბლიკაში დაინერგა ხარისხის გაუმჯობესების მრავალმხრივი ნაბიჯები, როგორიცაა კლინიკური გაიდლაინების შემუშავება, პერსონალის გადამზადება და ჰოსპიტალების მართვის გაძლიერება.
სტატიაში ახალშობილთა მოვლის ხარისხის გაუმჯობესების შეფასება ჯანდაცვის მსოფლიო ორგანიზაციის მეთოდოლოგიის გამოყენებით ხდება.
შედეგები საბოლოო დამუშავდა მსოფლიო ჯანდაცვის ორგანიზაციის ევროპის რეგიონული ბიუროს ხარისხის მართვის ოფისში (ქ. ათენი), სადაც მონაწილეობდნენ და კურირებდნენ ანალიზისა და მონაცემთა დამუშავების პროცესს შესაბამისი ექსპერტები. გამოყენებულ იქნა Wilcoxon-ის რანგირების ტესტი, რათა დაფიქსირებულიყო ცვლილებები ნეონატალური მოვლის სხვადასხვა სფეროში ინტერვენციის დაწყებამდე და მისი დასრულების შემდეგ. P-ნიშანი <0.05 ითვლებოდა სტატისტიკურად სარწმუნო მნიშვნელობად. ანალიზი განხორციელდა SPSS პროგრამის გამოყენებით (ვერსია 27, IBM Corp., Armonk, New York, USA).
კვლევას აქვს მნიშვნელოვანი პრაქტიკული და სამეცნიერო მნიშვნელობა. იგი ადასტურებს, რომ სტანდარტებზე დაფუძნებული და გუნდური მიდგომა რეალურ შედეგს იძლევა რესურსებით შეზღუდულ გარემოში. კვლევის შედეგები რეკომენდებულია როგორც სხვა ქვეყნებისთვის სამაგალითო პრაქტიკა.
Journal of Global Health არის რეცენზირებული, მაღალი რეიტინგის მქონე სამეცნიერო ჟურნალი (Impact Factor ~4.5), რომელიც სპეციალიზებულია გლობალური ჯანდაცვის საკითხებზე. ჟურნალი ინდექსირებულია წამყვან სამეცნიერო ბაზებში, მათ შორის PubMed, Scopus და Web of Science, და განთავსებულია Q1 კვარტილში, რაც კიდევ ერთხელ უსვამს ხაზს კვლევის მნიშვნელობასა და ხარისხს.
იხილეთ სტატიის ბმული