თსსუ-ის სტუდენტური სიმულაციური კლუბი საერთაშორისო პარტნიორობას აფართოებს. კლუბთან თანამშრომლობის და საერთო პროექტების განხორციელების სურვილი და მზაობა გამოთქვა რაჰმი მ. ქოჩის ინტერვენციული მედიცინის, განათლებისა და სიმულაციის აკადემიის (Rahmi M. Koç Academy of Interventional Medicine, Education, and Simulation — RMK AIMES) სამედიცინო დირექტორმა, ულუფერ სირვიკაიამ, რომელიც აქტიურად თანამშრომლობს თსსუ-ის კლინიკური უნარებისა და მულტიდისციპლინური სიმულაციების ცენტრთან.
შეთანხმება ქ. სტამბოლში შედგა, როდესაც აკადემიას თსსუ-ის სტუდენტური სიმულაციური კლუბის პრეზიდენტი ივლიანე სურმავა სტუმრობდა. შემდეგი ნაბიჯი, ერთობლივი პროექტების შემუშავებაა.
‘’ამ ვიზიტმა მნიშვნელოვანი როლი ითამაშა ჩემი გამოცდილების გაღრმავებაში და ახალი საერთაშორისო პარტნიორული ურთიერთობების ჩამოყალიბებაში, რაც პირდაპირ ემსახურება თსსუ-ის სტუდენტური სიმულაციური კლუბის განვითარებას და სტუდენტთა ჩართულობის გაზრდას თანამედროვე სიმულაციურ და საგანმანათლებლო პრაქტიკაში, საერთაშორისო ასპარეზზე’’ - განაცხადა ივლიანე სურმავამ.
თსსუ-ის მედიცინის ფაკულტეტის კურსდამთავრებული და თსსუ-ის სტუდენტური სიმულაციური კლუბის პრეზიდენტი თურქეთის ქალაქ სივასში 2025 წლის 9-17 აგვისტოს Erasmus+ პროგრამის ფარგლებში იმყოფებოდა. მან მონაწილეობა მიიღო ახალგაზრდულ პროექტში, რომელიც ეძღვნებოდა კატასტროფების მართვის, გადარჩენის უნარებისა და გარემოსდაცვითი გამოწვევების შესწავლას.
პროექტში მონაწილეობდნენ სამი ქვეყნის — საქართველოს, თურქეთისა და პოლონეთის — წარმომადგენლები. ღონისძიების მსვლელობისას, თანასწორთა განათლების პრინციპის ფარგლებში, მონაწილეებმა ერთმანეთს გაუზიარეს გამოცდილება პირველადი გადაუდებელი დახმარების სწავლებაში და მომავალი თანამშრომლობის ახალი გზებიც დაგეგმეს.
თსსუ ამაყობს თავისი კურსდამთავრებულებით, მხარს უჭერს სტუდენტურ პროექტებს და მუდამ მათი გულშემატკივარი რჩება.