თბილისის სახელმწიფო სამედიცინო უნივერსიტეტმა ზოგადი პრაქტიკისა და საოჯახო მედიცინის პედაგოგთა ევროპული აკადემიის / European Academy of Teachers in General Practice/Family Medicine (EURACT) წარმომადგენლებს უმასპინძლა. თსსუ-ში გამართულ საერთაშორისო შეხვედრას ევროპის 15 ქვეყნიდან ჩამოსული სტუმრები ესწრებოდნენ.

მონაწილეებმა საოჯახო მედიცინისა და კომუნიკაციური უნარების სწავლების მიმართულებით მათ ქვეყნებში არსებულ გამოცდილებაზე ისაუბრეს. განსაკუთრებული ყურადღება დაეთმო ამ სფეროში არსებულ უახლეს სასწავლო მიდგომებსა, მათ შორის ციფრული სწავლების მეთოდების დანერგვას  და კურიკულუმის განვითარების თანამედროვე სტანდარტებს.

სტუმრებს თბილისის სახელმწიფო სამედიცინო უნივერსიტეტის საოჯახო მედიცინის დეპარტამენტის ხელმძღვანელმა, პროფესორმა გივი ჯავაშვილმა, კომუნიკაციური უნარებისა და საოჯახო მედიცინის სწავლების პროცესი და ის მეთოდები გააცნო, რაც უკვე დანერგილია უნივერსიტეტში.

საერთაშორისო შეხვედრის მონაწილეებმა  სამომავლო თანამშრომლობის შესაძლებლობებზეც იმსჯელეს.

(EURACT) არის ევროპის მასშტაბით ყველაზე მსხვილი ორგანიზაცია, რომელიც აერთიანებს საოჯახო მედიცინის პედაგოგებს 40-ზე მეტი ქვეყნიდან. ორგანიზაციის მთავარი მიზანია საოჯახო მედიცინის სწავლების ხარისხის გაუმჯობესება, ამ მიმართულებით სწავლების ინოვაციური მეთოდების განვითარება/დანერგვა და საერთაშორისო თანამშრომლობის გაღრმავება.