აპრილის ბოლო კვირას მსოფლიოში სამედიცინო ლაბორატორიის პროფესიონალების კვირეული აღინიშნება, რომელიც ხაზს უსვამს ლაბორატორიული მედიცინის დიდ მნიშვნელობას როგორც დიაგნოსტიკის პროცესში, ისე ზოგადად თანამედროვე მედიცინაში. საქართველო, და კერძოდ თბილისის სახელმწიფო სამედიცინო უნივერსიტეტი, ტრადიციულად, წელსაც შეუერთდა კამპანიას.
მიმდინარე წლის კვირეულის სლოგანია „ლაბორატორიები გადაარჩენენ სიცოცხლეს“ .
2025 წლის 26 აპრილს, თბილისის სახელმწიფო სამედიცინო უნივერსიტეტში, მთელი ქვეყნის მასშტაბით შეკრებილმა ლაბორატორიული მედიცინის წარმომადგენლებმა აღნიშნული თარიღი მრავალფეროვანი და კრეატიული ღონისძიებებით აღინიშნეს.
შეხვედრა გახსნეს და კოლეგებს სიტყვით მიმართეს: ნინო აბსესაძემ, მარდალეიშვილის კლინიკის ლაბორატორიის ხელმძღვანელმა და დაავადებათა კონტროლის ეროვნული ცენტრის ლუგარის ლაბორატორიის სახელმწიფო პროგრამების კოორდინატორმა და პროფესორმა ნინო გოგოხიამ, თბილისის სახელმწიფო სამედიცინო უნივერსიტეტის ლაბორატორიული საქმის დეპარტამენტის ხელმძღვანელმა.
„ის ფაქტი, რომ ვუერთდებით ლაბორატორიული მედიცინის მსოფლიო კვირეულის დღეებს, ნათლად მეტყველებს იმაზე, თუ რამდენად მნიშვნელოვანი და ღირებულია ეს სფერო.
საქართველოში ეს დარგი საკმაოდ კარგად არის განვითარებული — გვყავს მაღალკვალიფიციური სპეციალისტები და ამ სფეროთი დაინტერესებული აქტიური პროფესიონალები. თუმცა უნდა აღვნიშნოთ, რომ ლაბორატორიულ მედიცინას მუდმივი პროგრესი სჭირდება.
მჯერა, რომ მსგავსი ინიციატივებით ჩვენ არამხოლოდ გავაცნობთ საზოგადოებას ამ დარგის მნიშვნელობას, არამედ ხელს შევუწყობთ მის განვითარებას და საერთაშორისო სტანდარტებთან ინტეგრაციას“,- აღნიშნა თსსუ-ის პროფესორმა ნინო გოგოხიამ.
ქართველ კოლეგებს პროფესიული დღე მიულოცეს (International Federation of Clinical Chemistry and Laboratory Medicine - IFCC) პრეზიდენტმა, პროფესორმა თომაზ ოზბენმა და ევროპის ლაბორატორიული მედიცინის ფედერაციის (European Federation of Clinical Chemistry and Laboratory Medicine - EFL) პრეზიდენტმა, მარიო პლებანმა, რომლებიც ღონისძიებას ონლაინ დაესწრნენ.
ორგანიზატორებმა ლაბორატორიული მედიცინის დარგის განვითარებაში შეტანილი განსაკუთრებული წვლილისთვის საჩუქრები გადასცეს პროფესორ ალა (აკა) ზედგენიძესა და თბილისის სახელმწიფო სამედიცინო უნივერსიტეტის ემერიტუსს ნინა ბუკიას.
ღონისძიების ფარგლებში გაიმართა დარგის პროფესიონალების მიერ შექმნილი მხატვრული და ხელნაკეთი ნამუშევრების გამოფენა. შეხვედრა დასრულდა შემოქმედებითი საღამოთი.
