2023 წლის სექტემბრიდან დეკემბრის ჩათვლით თბილისის სახელმწიფო სამედიცინო უნივერსიტეტში გაცვლითი პროგრამის ფარგლებში ვენის (ავსტრია) სამედიცინო უნივერსიტეტის სტუდენტები: ლეონ ალექსანდერ პფეილი და დანიელ ბადი კამიაბი იმყოფებოდნენ.
ავსტრიელმა სტუდენტებმა კლინიკური სტაჟირება თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის ბაზაზე არსებულ თსსუ-ის ყელ-ყურ-ცხვირის სნეულებათა, თვალის სნეულებათა, ნერვულ სნეულებათა პროპედევტიკის და ტოპიკური დიაგნოსტიკის, ასევე მეანობა-გინეკოლოგიის დეპარტამენტებში გაიარეს.
როგორც სტუდენტებმა აღნიშნეს, საქართველოში მიღებული გამოცდილება მათ სამომავლო, პროფესიულ გეგმებზე დადებითად აისახება.
„ყველაზე საინტერესო პაციენტებთან კომუნიკაცია იყო, თუმცა, ამავდროულად, ეს ძალიან საპასუხისმგებლო პროცესია. აქ ყოფნის პერიოდში განმივითარდა როგორც კლინიკური, ასევე პროფესიული კომუნიკაციის უნარი. საერთო ჯამში, სტაჟირება ნაყოფიერი იყო.
რაც შეეხება ქვეყანას, გულწრფელად გაოცებული ვარ. საქართველო არის ულამაზესი. აქამდე არ ვიცოდი ამ ქვეყნის შესახებ. მოხარული ვარ, რომ ასეთ გულისხმიერ და კეთილ ხალხს შევხვდი. ვფიქრობ, აუცილებლად დავბრუნდები საქართველოში“, - განაცხადა დანიელ ბადი კამიაბიმ.
აღსანიშნავია, რომ ავსტრიელი სტუდენტების საქართველოში სტაჟირებას კოორდინირებას უწევდნენ: თბილისის სახელმწიფო სამედიცინო უნივერსიტეტის მეანობა-გინეკოლოგიის დეპარტამენტის ასოცირებული პროფესორი და თსსუ-ის პირველი საუნივერსიტეტო კლინიკის პერინატოლოგიის მიმართულების ხელმძღვანელი პლატონ მაჭავარიანი; ყელ-ყურ-ცხვირის სნეულებათა დეპარტამენტის ხელმძღვანელი, პროფესორი ნატო ნაკუდაშვილი; ნერვულ სნეულებათა პროპედევტიკისა და ტოპიკური დიაგნოსტიკის დეპარტამენტის ხელმძღვანელი, პროფესორი მაია ბერიძე.
მათი შეფასებით, ვენის სამედიცინო უნივერსიტეტის სტუდენტებმა ამ პერიოდის განმავლობაში გაიუმჯობესეს პრაქტიკული მუშაობის უნარ-ჩვევები და მიიღეს კარგი გამოცდილება.
„ავსტრიელი სტუდენტები ესწრებოდნენ სამედიცინო მანიპულაციებს, კლინიკური შემთხვევების გარჩევებს. ჩვენს კლინიკაში, მესამე დონის კლინიკის განყოფილებაში ყველაზე მძიმე შემთხვევების გარჩევა ხდება. ვფიქრობ, ეს მათთვის კარგი კლინიკური გამოცდილებაა. ზოგადად, ძალიან სასიამოვნოა, როდესაც სხვადასხვა ქვეყნის სტუდენტების ინტეგრაცია ხდება. მათთვის ეს ურთიერთობები მომავალში დადებითი შედეგების მომტანი იქნება“, - განაცხადა ასოცირებულმა პროფესორმა პლატონ მაჭავარიანმა.
„სტუდენტები ყოველდღიურ რეჟიმში ესწრებოდნენ შემოვლას, ეხმარებოდნენ ექთნებს, ჰქონდათ პაციენტებთან კომუნიკაცია და სწავლობდნენ მათთვის საინტერესო მანიპულაციებს. ისინი სრულად იყვნენ ჩართულები დეპარტამენტის მუშაობაში და ვფიქრობ, კმაყოფილები დარჩნენ. წარმატებებს ვუსურვებ მათ“, - აღნიშნა პროფესორმა მაია ბერიძემ.
„ავსტრიელი სტუდენტები ძალიან კმაყოფილები არიან, ვინაიდან მათ პაციენტებთან აქტიური მუშაობის საშუალება მიეცათ. ამ ყველაფერს ისინი ახორციელებდნენ ექიმების მეთვალყურეობის ქვეშ. ცალკე უნდა აღინიშნოს გაცვლით პროგრამაში მონაწილეების ურთიერთობა თსსუ-ის სტუდენტებთან. ისინი ცვლიან ინფორმაციებს, უზიარებენ ერთმანეთს გამოცდილებას, რაც მათი განვითარებისთვის და ურთიერთობებისთვის ძალიან მნიშვნელოვანია“, - აღნიშნა პროფესორმა ნატო ნაკუდაშვილმა.