2023 წლის სექტემბერში თსსუ-ის დიპლომირებული მედიკოსის ამერიკული პროგრამის დელეგაცია ოფიციალური ვიზიტით იმყოფებოდა ემორის უნივერსიტეტის მედიცინის სკოლაში (აშშ).
ჯგუფის შემადგენლობაში შედიოდნენ: დიპლომირებული მედიკოსის ამერიკული პროგრამის დირექტორი, ასოცირებული პროფესორი ეკა ეკალაძე; პედიატრიის კლერკშიფის თანახელმძღვანელი, კურსის ,,გახდი ექიმი“ კოორდინატორი, ასოცირებული პროფესორი ნანი ყავლაშვილი; ნეიროქირურგიის კლერკშიფის ხელმძღვანელი, ,,გახდი ექიმის“კურსის ინსტრუქტორი ლია ხორბალაძე და შინაგანი მედიცინის (კარდიოლოგიის მიმართულების) კლერკშიფის განმახორციელებელი გიორგი კაჭახიძე.
ვიზიტს თსსუ-ის მხრიდან კოორდიანციას უწევდა პროფესორი არჩილ უნდილაშვილი, ხოლო ემორის უნივერსიტეტის მხრიდან - პროფესორი გორდონ ჩერჩვორდი.
მივლინების მიზანი იყო მხარეებს შორის ურთიერთთანამშრომლობის გაღრმავება, სასწავლო, კლინიკური და კვლევითი პროცესების გაცნობა-გაზიარება, საგამოცდო პროცესების მართვის პრინციპების, ასევე, აკადემიური პერსონალის განვითარების პროგრამების გაცნობა და სხვ.
პედიატრიის, შინაგანი მედიცინის (კარდიოლოგიის), ნეიროქირურგიისა და ,,გახდი ექიმის“ სასწავლო კურსების ფარგლებში თსსუ-ის წარმომადგენლები დაესწრენენ ლექციებსა და ტრენინგ-კურსებს.
აშშ-ში ვიზიტისას თსსუ-ის დიპლომირებული მედიკოსის ამერიკული პროგრამის დელეგაციის წევრები შეხვდნენ ემორის უნივერსიტეტის მედიცინის სკოლის წარმომადგენლებს. მათ შორის, დიპლომირებული მედიკოსის ამერიკული პროგრამის განვითარებაში ადრიდანვე ჩართულ პროფესორებთან - გორდონ ჩერჩვორდთან, მერი ჯო ლეკოვიჩთან და ჯოელ ფელნერთან.
ზემოაღნიშნული აქტივობების პარალელურად ჯგუფის წევრებმა დაათვალიერეს ემორის უნივერსიტეტის მედიცინის სკოლის სასწავლო და კვლევითი სივრცეები, მათ შორის - ანატომიის ლაბორატორია, სიმულაციური ცენტრი, გრეიდის ჰოსპიტალი, ვინშიფის მემორიალური ჰოსპიტალი, სხვ.
,,შეხვედრებისას შეჯერდა აზრები, გაჩნდა მრავალი იდეა, დაიგეგმა ბევრი აქტივობა, რაც დიდად წაადგება არა მხოლოდ თსსუ-ის დიპლომირებული მედიკოსის ამერიკული პროგრამის განვითარებას, არამედ, ზოგადად, სამედიცინო განათლებას საქართველოში“ - აღნიშნეს ჯგუფის წევრებმა.
