თბილისის სახელმწიფო სამედიცინო უნივერსიტეტში გაიხსნა ახალგაზრდა მეცნიერთა კვირეული - „ახალგზარდა მეცნიერები პლანეტის უკეთესი მომავლისთვის“, რომელიც, ტრადიციულად, ყოველწლიურად განათლების, მეცნიერების და ახალგაზრდობის სამინისტროს ორგანიზებით ტარდება.

 პირველი ღონისძიება  - კონფერენცია სახელწოდებით -  „ცხოვრების ჯანსაღი წესი“, გახსნა თბილისის სახელმწიფო სამედიცინო უნივერსიტეტის ვიცე-რექტორმა, პროფესორმა სოფიო ბახტაძემ. მოსწავლეებს, სტუდენტებსა და ახალგაზრდა მეცნიერებს მისასალმებელი სიტყვით მიმართა განათლების, მეცნიერების და ახალგაზრდობის მინისტრის მოადგილემ ზვიად გაბისონიამ. კონფერენციის ფარგლებში ლექციებით  წარსდგნენ:

• პროფესორი ხათუნა თოდაძე ლექციით თემაზე: „დოფამინის ერა -  რატომ გახდა XXI საუკუნე დამოკიდებულებების ეპოქა!“;

• პროფესორი ლელა მასხულია ლექციით „დაბალი ფიზიკური აქტივობის გავლენა ჯანმრთელობაზე“ 

მოსწავლეების ერთი ნაწილი ესტუმრა თსსუ-ის მოლეკულური და სამედიცინო გენეტიკის დეპარტამენტთან არსებულ სიცოცხლის მეცნიერებათა მუზეუმს, სადაც მათ დიდი ინტერესით დაათვალიერეს სხვადასხვა ექსპონატები და თვალსაჩინოებები, ხოლო მეორე ნაწილმა მონაწილეობა მიიღო თსსუ-ის სამეცნიერო უნარ-ჩვევების ცენტრში გამართულ სასწავლო-პრაქტიკულ ტრენინგში - „სახალისო ლაბორატორია და ექსპერიმენტული კვლევები ლაბორატორიულ ვირთაგვებზე“. სამეცნიერო უნარ-ჩვევების ცენტრის დირექტორი, პროფესორი ლუიზა გაბუნია მათ ესაუბრა ექსპერიმენტულ-ლაბორატორიული კვლევების მიზნებსა და მნიშვნელობაზე ბიოსამედიცინო მეცნიერებებში და კლინიკურ პრაქტიკაში.