მიმდინარე წლის 1 ივნის, ბავშვთა დაცვის საერთაშორისო დღესთან დაკავშირებით, თბილისის სახელმწიფო სამედიცინო უნივერსიტეტის აპოლონ ურუშაძის სახელობის საუნივერსიტეტო სტომატოლოგიურმა კლინიკამ და თბილისის სახელმწიფო სამედიცინო უნივერსიტეტის N1 სტომატოლოგიურმა კლინიკამ თბილისის 198–ე საჯარო სკოლასთან არსებული არასამთავრობო ორგანიზაციის – „მშობელთა ხიდის“ 15 ბენეფიციარს უმასპინძლა.
საქველმოქმედო აქციის ფარგლებში, „მშობელთა ხიდის“ ბენეფიციარებს ჩაუტარდათ პირის ღრუს ჰიგიენური დათვალიერება, გაეწიათ შესაბამისი სტომატოლოგიური კონსულტაციები და დაიგეგმა კბილთ–მკურნალობა.
საქველმოქმედო ღონისძიების მხარდამჭერმა კომპანიებმა და ორგანიზაციებმა: „ქოლგეითი“, „პრეზიდენტი“, ფარმაცევტული კომპანია „გეა“, ჯანდაცვის პროფესიონალთა ლიგა – თითოეულ ბენეფიციარს საჩუქრად გადასცეს: კბილის პასტები, ჯაგრისები, პირის ღრუს ლორწოვანი გარსის დაავადებების სამკურნალო გელი).
ბავშვთა დაცვის საერთაშორისო დღესთან დაკავშირებული საქველმოქმედო აქციები თბილისის სახელმწიფო სამედიცინო უნივერსიტეტის სტომატოლოგიური კლინიკებისთვის ტრადიციულია და ყოველწლიურად იმართება.