ეპილეფსიის თანამედროვე დიაგნოსტიკა, მკურნალობის მეთოდები, ეპილეფსიის ქირურგია - ამ და სხვა საკითხებზე თბილისის სახელმწიფო სამედიცინო უნივერსიტეტში ვენის სამედიცინო უნივერსიტეტის პროფესორებმა 8 აპრილს საჯარო ლექციები ჩაატარეს.

ღონისძიების დაწყებამდე, თსსუ-ის რექტორმა, პროფესორმა ირაკლი ნატროშვილმა მადლობა გადაუხადა ვენის სამედიცინო უნივერსიტეტის პროფესორებს სტუმრობისა და გამოცდილების გაზიარებისთვის. 

თსსუ-ის კურსდამთავრებულმა, ვენის სამედიცინო უნივერსიტეტის ნევროლოგიის დეპარტამენტის ასოცირებულმა პროფესორმა, ვენის საუნივერსიტეტო კლინიკის ეპილეფსიის განყოფილების ხელმძღვანელმა ეკატერინე პატარაიამ წაიკითხა ლექცია თემაზე:  ,,ეპილეფსია: თანამედროვე დიაგნოსტიკური მეთოდები და მკურნალობის საშუალებები“.

ვენის სამედიცინო უნივერსიტეტის ნეიროქირურგიის დეპარტამენტის ასოცირებული პროფესორი ქრისტიან დორფერი დამსწრე აუდიტორიის წინაშე წარსდგა თემით: ,,ეპილეფსიის ქირურგია - სად ვართ ჩვენ?"  

პროფესორებმა მიმოიხილეს ეპილეფსიის მკურნალობის თანამედროვე მეთოდები და ახალი დიაგნოსტიკური საშუალებები. მომხსენებლებმა განსაკუთრებული ყურადღება დაუთმოეს ეპილეფსიის მკურნალობის ქირურგიულ მეთოდებს და ამ მიმართულებით გლობალურ ინოვაციებს.

საჯარო ლექციებს ესწრებოდნენ თსსუ-ის სტუდენტები, აკადემიური და ადმინისტრაციული პერსონალი.