თბილისის სახელმწიფო სამედიცინო უნივერსიტეტში, 2023 წლის 3 ივლისიდან 3 აგვისტოს ჩათვლით გაცვლითი პროგრამით, სტაჟირების გასავლელად, ინსბრუკის (ავსტრია) სამედიცინო უნივერსიტეტის სტუდენტები: სარა სილბერგერი და თამარა ფალჩეტო იმყოფებოდნენ.
აღსანიშნავია, რომ სტუდენტებმა კლინიკური სტაჟირება თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის ბაზაზე არსებულ თსსუ-ის მეანობა-გინეკოლოგიის დეპარტამენტში გაიარეს.
„ყოველთვის მინდოდა სხვა ქვეყნის ჯანდაცვის სისტემას გავცნობოდი. თითქმის ყველაფერი მსგავსია, ტექნიკა, რომელსაც ქართველი ექიმები იყენებენ, ავსტრიის სამედიცინო სისტემის თითქმის იდენტურია. საინტერესო ერთი თვე გავატარე მეანობა-გინეკოლოგიის დეპარტამენტში. ყურადღებით ვაკვირდებოდი ყველა სამედიცინო მანიპულაციას, რომლებსაც ქართველი ექიმები ატარებდნენ. ნაყოფიერი ერთი თვე იყო, მადლობა თბილისის სახელმწიფო სამედიცინო უნივერსიტეტს ამ შესაძლებლობისთვის“, - ამბობს სარა სილბერგერი.
„თბილისის სახელმწიფო სამედიცინო უნივერსიტეტი ინსბრუკის სამედიცინო უნივერსიტეტის პარტნიორია, ამიტომ, მარტივი აღმოჩნდა გაცვლით პროგრამაში ჩართვა და საქართველოში ჩამოსვლა. მეანობა-გინეკოლოგიის დეპარტამენტში ვიყავი და ეს იყო საუკეთესო გამოცდილება. დღე იწყებოდა დილის თათბირებით, ვეცნობოდით პაციენტების სამედიცინო ისტორიებს და შესაბამისად, ექიმებთან ერთად ვგეგმავდით მათ მკურნალობას. 11 საათზე იწყებოდა ოპერაციები, ჩვენ ყურადღებით ვაკვირდებოდით ამ პროცესს“, - ამბობს თამარა ფალჩეტო.
აღსანიშნავია, რომ ავსტრიელი სტუდენტების საქართველოში სტაჟირებას თბილისის სახელმწიფო სამედიცინო უნივერსიტეტის მეანობა-გინეკოლოგიის დეპარტამენტის ასოცირებული პროფესორი და თსსუ-ის პირველი საუნივერსიტეტო კლინიკის პერინატოლოგიის მიმართულების ხელმძღვანელი პლატონ მაჭავარიანი უწევდა კოორდინირებას.
მისი შეფასებით, ინსბრუკის სამედიცინო უნივერსიტეტის სტუდენტებმა ამ პერიოდის განმავლობაში გაიუმჯობესეს პრაქტიკული მუშაობის უნარ-ჩვევები და მიიღეს კარგი გამოცდილება.
შეგახსენებთ, რომ თბილისის სახელმწიფო სამედიცინო უნივერსიტეტის პირველ საუნივერსიტეტო კლინიკაში ავსტრიელი სტუდენტები თსსუ-სა და ინსბრუკის სამედიცინო უნივერსიტეტს შორის გაფორმებული ხელშეკრულების ფარგლებში გაცვლითი პროგრამით იმყოფებოდნენ.