ევროპის პედიატრიული ნევროლოგიური საზოგადოების (EPNS) მე-16 კონგრესს, რომელიც გერმანიის ქალაქ მიუნჰენში გაიმართა, თბილისის სახელმწიფო სამედიცინო უნივერსიტეტის ვიცე-რექტორი, ბავშვთა ნევროლოგიის დეპარტამენტის ხელმძღვანელი, პროფესორი სოფიო ბახტაძე ესწრებოდა.
ვიზიტის ფარგლებში, თსსუ-ის პროფესორმა რამდენიმე სამუშაო შეხვედრა გამართა ევროპელ კოლეგებთან. განსაკუთრებული ყურადღება გამახვილდა სამომავლო სამეცნიერო და საგანმანათლებლო თანამშრომლობის გაღრმავებაზე, რაც მნიშვნელოვნად შეუწყობს ხელს ბავშვთა ნევროლოგიის მიმართულების განვითარებას როგორც საქართველოში, ისე ევროპის მასშტაბით.
კონგრესის პირველ დღეს EPNS-ის აღმასრულებელი საბჭოს სხდომა გაიმართა. სხდომის ფარგლებში მოეწყო ეროვნული დამკვირვებლების კომიტეტის შეხვედრა, რომელსაც საქართველოს წარმომადგენლის სტატუსით დაესწრო პროფესორი სოფიო ბახტაძე. სხდომის მთავარი თემა იყო ბავშვთა ნევროლოგიის პოსტდიპლომური განათლების ოპტიმიზაცია და მისი ევროპულ სტანდარტებთან ჰარმონიზაცია.
კონგრესის ფარგლებში პროფესორი სოფიო ბახტაძე, მიუნჰენის ლუდვიგ მაქსიმილიანის საუნივერსიტეტო კლინიკის პედიატრიული ნევროლოგიური დეპარტამენტისა და ეპილეფსიის ცენტრის ხელმძღვანელ, პროფესორ ინგო ბორგრაფესთან ერთად, ეპილეფსიის პლენარული სექციის თანათავმჯდომარე იყო.
