თბილისის სახელმწიფო სამედიცინო უნივერსიტეტის მოლეკულური და სამედიცინო გენეტიკის დეპარტამენტის ხელმძღვანელი პროფ. თინათინ ტყემალაძე არადიაგნოზირებული დაავადებების საერთაშორისო ქსელის (Undiagnosed Disease Network Internationa – UDNI) დირექტორთა საბჭოს წევრად აირჩიეს. 

UDNI დირექტორთა საბჭო 12 წევრისგან შედგება, აქედან 4 არის მუდმივი წევრი, ხოლო დანარჩენებს სამწლიანი ვადით ირჩევენ.

UDNI  გლობალური ორგანოზაციაა, რომლის ძირითადი მიზნებია:

დიაგნოზის გაუმჯობესება: დიაგნოზის დასმა იმ პაციენტებისთვის, რომელთა მდგომარეობის იდენტიფიცირებაც ექსპერტმა კლინიცისტებმა ვერ მოახდინეს.

კვლევის განვითრება: იშვიათი და ახალი დაავადებების გამომწვევი მიზეზების ეტიოლოგიისა და პათოგენეზის შესწავლა.

დიაგნოსტიკის სტანდარტიზაცია: დიაგნოზის დასმის საერთო პროტოკოლებისა და სტანდარტების შემუშავებაში წვლილის შეტანა ისეთი უახლესი ტექნოლოგიების გამოყენებით, როგორიცაა ახალი თაობის სექვენირება, გრძელი წაკითხვის სექვენირება, ფუნქციური და ეპიგენეტიკური კველვები.

ცოდნის გაზიარება: კვლევის შედეგების ფართოდ და სწრაფად გავრცელება პაციენტებისა და მკვლევარების გლობალური საზოგადოების სასარგებლოდ.

მიზნების მისაღწევად ორგანზაცია ეფუძნება შემდეგ პრინციპებს:

საერთაშორისო თანამშრომლობა: UDNI აერთიანებს კლინიკურ და კვლევით ცენტრებს მთელი მსოფლიოდან, რათა გაუზიარონ ერთმანეთს ექსპერტიზა და რესურსები.

პაციენტთა ჩართულობა: ქსელი აქტიურად რთავს პაციენტებს და პაციენტთა ორგანიზაციებს თავის საქმიანობაში.

მონაცემთა გაზიარება: UDNI ხელს უწყობს სტანდარტიზებული კლინიკური და ლაბორატორიული მონაცემების გაზიარებას კვლევისა და დიაგნოზის მხარდასაჭერად. 

საზოგადოების შექმნა: UDNI ქმნის მკვლევართა თანამშრომლობით საზოგადოებას, რათა ერთობლივად გაუმკლავდნენ ამ რთულ სამედიცინო გამოწვევებს.

UDNI 2014 წელს დაარსდა და მასში გაერთიანებული არიან წარმომადგენლები მსოფლიოს 55-ზე მეტი ქვეყნიდან. 

ასეთ მნიშვნელოვან ორგანიზაციაში საქართველოს ჩართულობა კიდევ უფრო მეტად შეუწყობს ხელს საერთაშორისო თანამშრომლობების გაღრმავებას, კვლევების გაძლიერებასა და რთული დაავადებების დიაგნოსტიკის გაუმჯობესებას ჩვენს ქვეყანაში.