2015 წლის 17 ნოემბერს „მაგთის“ ჯაზკლუბში, აფხაზეთის ავტონომიური რესპუბლიკის უმაღლესი საბჭოს ინიციატივით, სტუდენტთა საერთაშორისო დღესთან დაკავშირებით, ჩატარდა ტრადიციული შეხვედრა აფხაზეთიდან დევნილ წარჩინებულ სტუდენტებთან.

ღონისძიებას ესწრებოდნენ საქართველოს მთავრობის, აფხაზეთის ავტონომიური რესპუბლიკის უმაღლესი საბჭოსა და უმაღლესი სასწავლებლების რექტორები.

სტუდენტებს მიესალმა აფხაზეთის ავტონომიური რესპუბლიკის უმაღლესი საბჭოს თავმჯდომარე ვახტანგ ყოლბაია: „აფხაზეთის ავტონომიური რესპუბლიკის უმაღლესი მთავრობა ულოცავს ჩვენი ქვეყნის მომავალ თაობას სტუდენტთა  საერთაშორისო დღეს. ღრმად ვარ დარწმუნებული, რომ სწორედ ჩვენი სტუდენტობა არის ქვეყნის ის პოტენციური ძალა, რომელიც ყველაზე მეტად აფასებს მსოფლიოს თანამედროვე დემოკრატიულ ფასეულობებს და რომლის საფუძველზეც მომავალში ხელს შეუწყობს ჩვენი ქვეყნის ტერიტორიული მთლიანობის აღდგენას და განამტკიცებს მის სუვერენიტეტს და საერთაშორისო ავტორიტეტს“.

წარჩინებულ სტუდენტებს მიმართა თბილისის სახელმწიფო სამედიცინო უნივერსიტეტის რექტორმა, პროფესორმა ზურაბ ვადაჭკორიამ. მადლობა მოახსენა აფხაზეთის ავტონომიური რესპუბლიკის უმაღლეს საბჭოს აღნიშნული ღონისძიების ტრადიციად ჩამოყალიბებისთვის და თითოეულ სტუდენტს კარგი სწავლისთვის. მან, საზეიმოდ დააჯილდოვა თბილისის სახელმწიფო სამედიცინო უნივერსიტეტის აფხაზეთიდან დევნილი 7 წარჩინებული სტუდენტი:

1. ნინო კვირტია – მედიცინის ფაკულტეტი (IX-X სემესტრი)
2. დიანა ჯალაღონია – მედიცინის ფაკულტეტი (IX-X სემესტრი)
3. ნათია უზარაშვილი – მედიცინის ფაკულტეტი (IX-X სემესტრი)
4. თამარ გახოკიძე – სტომატოლოგიის ფაკულტეტი (IX-X სემესტრი)
5. თამთა ქარჩავა – ფარმაციის ფაკულტეტი (VII-VIII სემესტრი)
6. ელენე ჯოლოხავა – საზოგადოებრივი ჯანდაცვის ფაკულტეტი (VII-VIII სემესტრი)
7. მარიკა ხაზალია – ფიზიკური მედიცინის და რეაბილიტაციის ფაკულტეტი (VII-VIII სემესტრი)

თითოეულ  სტუდენტს საჩუქრად გადაეცა უნივერსიტეტის სიმბოლიკით გაფორმებული სამახსოვრო სუვენირები და მერკის ცნობარი “Home Health HandBook”.