მეცნიერებისა და ინოვაციების საერთაშორისო ფესტივალი 2018–ის ფარგლებში 25 სექტემბრს, თბილისის სახელმწიფო სამედიცინო უნივერსიტეტის იოველ ქუთათელაძის ფარმაკოქიმიის ინსტიტუტში ჩატარდა  ღია კარის დღე – "ქართული ფარმაცია, მეცნიერება და წამალი - ტრადიციების პატივისცემით მომავლისაკენ".

ღონისძიებას  სხვადასხვა სკოლის დამამთავრებელი  კლასის მოსწავლეები დაესწრნენ,  მათი უმრავლესობისთვის  განსაკუთრებით მნიშვნელოვანი იყო მიღებული ინფორმაცია მომავალი პროფესიის  არჩევის თვალსაზრისით.

სტუმრებს ინსტიტუტის ისტორიისა და ტრადიციების შესახებ ლექცია წაუკითხა ფარმაკოქიმიის ინსტიტუტის დირექტორმა, თბილისის სახელმწიფო სამედიცინო უნივერსიტეტის ასოცირებულმა პროფესორმა ნანა გორგასლიძემ.  სკოლის მოსწავლეებმა მოისმინეს ახალგაზრდა მაგისტრების: მ.კაჭარავას,  გ.ჯგერენაიას,  გ.მერაბიშვილის და დოქტორანტ გ.მოშიაშვილის მოხსენებები. დამთვალიერებლებს შესაძლებლობა ჰქონდათ, ენახათ სამკურნალო საშუალებებზე მუშაობის სხვადასხვა პროცესი: ექსტრაქტის მიღება და დამუშავება, რბილი სამკურნალო ფორმების (მალამოები, კრემები, სუპოზიტორიები) კომპოზიციის შერჩევა და მიღება.