თბილისის სახელმწიფო სამედიცინო უნივერსიტეტს (თსსუ) Erasmus+ პროგრამის ფარგლებში 2025 წლის 23-27 ივნისს რუმინეთის ტირგუ-მურეშის ჯორჯ ემილ პალადეს სახელობის მედიცინის, ფარმაციის, მეცნიერებისა და ტექნოლოგიების უნივერსიტეტის  ფიქსირებული პროთეზების დეპარტამენტის ასისტენტ-პროფესორი კინგა მარია იანოში ესტუმრა.

ვიზიტის ფარგლებში ასისტენტ-პროფესორ კინგა მარია იანოშს თსსუ-ის ორთოპედიული სტომატოლოგიის დეპარტამენტის ხელმძღვანელმა, პროფესორმა სამსონ მღებრიშვილმა უმასპინძლა. თსსუ-ის პროფესორმა სტუმარს წარუდგინა დეპარტამენტის აკადემიური პერსონალი, გააცნო სასწავლო პროგრამები, დეპარტამენტის კლინიკურ-სამეცნიერო საქმიანობა და მიმდინარე პროექტები. ასისტენტ-პროფესორი კინგა მარია იანოში სტომატოლოგიის ფაკულტეტის სტუდენტებს შეხვდა და სასწავლო პროცესსაც გაეცნო.

თსსუ-ის სტუმარმა  ასევე მოინახულა თსსუ-ის კლინიკური უნარებისა და  მულტიდისციპლინური სიმულაციის ცენტრი, სადაც მას დეტალურად გააცნეს ცენტრის სტრუქტურა და კლინიკური უნარების შეფასების მეთოდოლოგია. აღნიშნული ინფორმაცია პროფესორისთვის განსაკუთრებული მნიშვნელობის იყო, რადგან მის  უნივერსიტეტში მიმდინარეობს OSCE-ის სისტემის დანერგვის პროცესი, სტომატოლოგიის მიმართულებით.

ასისტენტ-პროფესორმა კინგა მარია იანოშმა ასევე დაათვალიერა თსსუ-ის  ბიბლიოთეკა და უნივერსიტეტის კამპუსი, ეწვია თსსუ-ს სიცოცხლის მეცნიერებათა მუზეუმს.

ვიზიტის ფარგლებში რუმინელ სტუმარს შეხვედრა ჰქონდა თსსუ-ის ვიცე-რექტორთან, ბავშვთა და მოზარდთა ყბა-სახის ქირურგიის და ქირურგიული სტომატოლოგიის დეპარტამენტის ხელმძღვანელთან, პროფესორ ზურაბ ვადაჭკორიასთან.  შეხვედრაზე განიხილეს ორი უნივერსიტეტის თანამშრომლობის ისტორია, ინტერნაციონალიზაციის პროცესები და უნივერსიტეტების ხილვადობის ზრდის მნიშვნელობა. ხაზი გაესვა ევროკავშირის Erasmus+ პროგრამის ფარგლებში აკადემიური და ადმინისტრაციული პერსონალის, ასევე სტუდენტების მობილობის როლს. 

თბილისის სახელმწიფო სამედიცინო უნივერსიტეტსა და ტირგუ-მურეშის ჯორჯ ემილ პალადეს სახელობის უნივერსიტეტს შორის გაფორმებულია თანამშრომლობის ხელშეკრულება Erasmus+ პროგრამის ფარგლებში.