თბილისის სახელმწიფო სამედიცინო უნივერსიტეტის ოდონტოლოგიის დეპარტამენტმა საქართველოს ახალგაზრდა სტომატოლოგთა ლიგის და European Visiting Program (EVP)-ის განხორციელებულ ერთობლივ ღონისძიებას -  EVP GEORGIA 2025-ს უმასპინძლა. ლექციები და სამუშაო შეხვედრები აპოლონ ურუშაძის სახელობის სტომატოლოგიურ კლინიკაში მიმდინარეობდა.

კონფერენციას სტუმრობდნენ იტალიის, საფრანგეთის, ჩეხეთის, ბულგარეთის, მოლდოვის, თურქეთის, რუმინეთის, უკრაინის და სლოვენიის სტომატოლოგიური სკოლების სტუდენტები. ღონისძიებაზე დასაწრებად ჩამოვიდა EVP პროექტის კოორდინატორი.

კონფერენცია გახსნა ღონისძიების ორგანიზატორმა, ოდონტოლოგიის დეპარტამენტის ხელმძღვანელმა, პროფესორმა მარინა მამალაძემ. სიტყვით გამოსვლისას პროფესორი კბილთა თანამედროვე ენდოდონტიური მკურნალობის კონცეპტუალურ საკითხებს შეეხო. 

კონფერენციის ფარგლებში გაიმართა თსსუ-ის ორთოდონტიის დეპარტამენტის ასისტენტ-პროფესორის, ავთანდილ ბაქრაძის ლექცია, მან სტომატოლოგიაში ხელოვნური ინტელექტის გამოყენების შესახებ ისაუბრა.

გარდა ამისა, პაროდონტოლოგიისა და პირის ღრუს ლორწოვანის დაავადებათა დეპარტამენტის მოწვეულმა მასწავლებელმა ქეთევან ინჯგიამ წაიკითხა ლექცია წითელი ბრტყელი ლიქენის სამკურნალო თანამედროვე მეთოდზე ორომუკოადჰეზიური მემბრანების გამოყენებით.

ასევე, აღსანიშნავია კლინიკის დირექტორის, თსსუ-ის ოდონტოლოგიის დეპარტამენტის ასოცირებული პროფესორის ლია სანოძისა და მოწვეული მასწავლებლის, მანანა უსტიაშვილის ხელმძღვანელობით გამართული მასტერკლასი, რომელიც გამოირჩეოდა მაღალ პროფესიულ დონეზე ორგანიზებითა და განხორციელებით. ის განსაკუთრებული მოწონებით აღინიშნა, როგორც სტუმრების, ისე ღონისძიების ორგანიზატორთა მხრიდან.

ცნობისთვის, საქართველოს ახალგაზრდა სტომატოლოგთა ლიგის დამფუძნებლები და წევრები არიან თბილისის სახელმწიფო სამედიცინო უნივერსიტეტის სტუდენტები და კურსდამთავრებულები. ორგანიზაცია აქტიურად ახორციელებს როგორც ადგილობრივი, ისე საერთაშორისო მასშტაბის კონფერენციებსა და პროფესიულ შეხვედრებს. 21 ივლისს გამართული საერთაშორისო კონფერენციაც სწორედ ამ საქმიანობათა ნაწილია და მიზნად ისახავდა თანამშრომლობის გაღრმავებასა და თანამედროვე სტომატოლოგიური პრაქტიკის პოპულარიზაციას.