საქართველოში გერმანიის საელჩოს ყოველთვიური ინტერნეტგამოცემის მარტის ნომერში გამოქვეყნებულია სტატია თბილისის სახელმწიფო სამედიცინო უნივერსიტეტსა და კოხ-მეჩნიკოვის ფორუმის თანამშრომლობის ფარგლებში ჩატარებული აქტივობების შესახებ. გთავაზობთ ამ სტატიას:

დაჯილდოება მედიცინისა და ჯანდაცვის სფეროში გერმანულ-ქართული თანამშრომლობის ფარგლებში

2013 წლის 18 თებერვალს თბილისის სახელმწიფო სამედიცინო უნივერსიტეტმა საპატიო დოქტორის ტიტული მიანიჭა პროფესორ ჰელმუტ ჰანს, დოქტორ იოჰან პროფსტერს და პროფესორ ტიმო ულრიხსს. ამით უნივერსიტეტმა პატივი მიაგო კოხ-მეჩნიკოვის ფორუმის ღვაწლს ბიომედიცინისა და ჯანდაცვის დარგში გერმანულ-ქართული ურთიერთობების განვითარებაში.

თბილისის სახელმწიფო სამედიცინო უნივერსიტეტსა და კოხ-მეჩნიკოვის ფორუმს შორის 2009 წლიდან არსებობს ინტენსიური ურთიერთობა. ამ ხნის განმავლობაში განხორციელდა ორმხრივი პროექტები ტუბერკულოზის კონტროლისა და კვლევის მიმართულებით, რომელთაც ხელმძღვანელობდა  თბილისის სახელმწიფო სამედიცინო უნივერსიტეტის მოწვეული/სტუმარი პროფესორი, ბატონი ტიმო ულრიხსი. გერმანიის აკადემიური გაცვლის სამსახურის (DAAD) მიერ გამოყოფილი სტიპენდიის ფარგლებში, თანამშრომლობა მოიცავდა შემდეგ სფეროებს:

• ლექციები, სემინარები და სხვა სასწავლო აქტივობები თბილისის სახელმწიფო სამედიცინო უნივერსიტეტში;
• სამეცნიერო თანამშრომლობა ტუბერკულოზის დარგში;
• მედიცინის და ჯანდაცვის სტუდენტების გაცვლითი პროგრამა ბერლინის პარტნიორ უნივერსიტეტებში (გერმანული ენის სწავლებას თბილისის სახელმწიფო სამედიცინო უნივერსიტეტში განსაკუთრებული ყურადღება ექცევა. ქართული მხრიდან პროგრამას ხელმძღვანელობს უცხო ენების ცენტრის დირექტორი, პროფესორი მანანა ქუთელია);
• მონაწილეობა თბილისის სახელმწიფო სამედიცინო უნივერსიტეტის სამედიცინო კურიკულუმის რეფორმაში, ბოლონიის პროცესში საბოლოო ინტეგრაციის მიზნით;
• საუნივერსიტეტო პარტნიორობის დაარსება თბილისის სახელმწიფო სამედიცინო უნივერსიტეტსა და აკონის ადამიანის მეცნიერებათა შემსწავლელ უმაღლეს სასწავლებელს შორის ერთობლივი სამაგისტრო პროგრამის ამოქმედების მიზნით საზოგადოებრივ ჯანდაცვაში.

ბატონ ჰანს საპატიო წოდება მიენიჭა, როგორც კოხ-მეჩნიკოვის ფორუმის პრეზიდენტს, ბიზნესმენს, ბატონ პროფსტერს კი – თბილისის სახელმწიფო სამედიცინო უნივერსიტეტში სამეცნიერო თანამშრომლობის,  კლინიკური და სასწავლო საქმიანობის ხელშეწყობის მიზნით გაწეული გულუხვი სპონსორობისთვის.