თსსუ-ის ეზოში დილიდან ხალხმრავლობა იყო, სადღესასწაულოდ მორთულ სივრცეში სტუდენტებთან ერთად შეიკრიბნენ მათი მშობლები, მეგობრები, გულშემატკივრები, აკადემიური პერსონალი და ადმინისტრაციის წარმომადგენლები. ფერადი დეკორაციები და მუსიკა ერთიანად ქმნიდა იმ ემოციურ გარემოს, სადაც თითოეული დეტალი ამ დღის განსაკუთრებულობას გამოხატავდა. სიხარულის, მადლიერებისა და იმედით სავსე განწყობა — დღე, როდესაც კურსდამთავრებულებმა ერთობლივად გაიაზრეს თსსუ-ში გატარებული წლების ძალისხმევის შედეგი და ის, რომ მათ ცხოვრებაში ახალი ეტაპი იწყება.
2025 წლის 8 ივლისს, თსსუ-ის მედიცინისა და სტომატოლოგიის საერთაშორისო ფაკულტეტის დიპლომირებული მედიკოსის პროგრამების 2025 წლის 256 კურსდამთავრებულის საზეიმო გამოსაშვები ცერემონია გაიმართა. მათ სწავლის დამთავრება და ცხოვრების ახალ ეტაპზე გადასვლა მიულოცა თბილისის სახელმწიფო სამედიცინო უნივერსიტეტის რექტორმა, პროფესორმა ირაკლი ნატროშვილმა. მან კურსდამთავრებულებს პროფესიული წარმატება უსურვა:
,,დღეს ძალიან განსაკუთრებული და საამაყო დღეა ყველა ჩვენგანისთვის და ჩემთვის პირადად. თსსუ-ს კიდევ ერთი გამოშვება ჰყავს. თქვენ ხდებით მსოფლიო მედიცინის დიდი ოჯახის წევრები. დღეს ასევე სევდიანი დღეცაა- ვემშვიდობებით სტუდენტებს, რომლებმაც ჩვენთან ერთად წლები გაატარეს. დღეს თქვენი ცხოვრების ერთი ეტაპი დასრულდა და იწყება ახალი. უნდა ამაყობდეთ თქვენი მიღწევით. ექიმობა არა მარტო პროფესია, არამედ მოწოდებაა, სადაც პრივილეგიას თან ახლავს დიდი პასუხისმგებლობა იმ ადამიანების მიმართ, ვინც განდობთ საკუთარ სიცოცხლეს და ჯანმრთელობას. დარწმუნებული ვარ ყველა გამოწვევას ღირსეულად გაუმკლავდებით. გილოცავთ და დიდ წარმატებას გისურვებთ პროფესიულ გზაზე. თქვენი ალმა მატერი ამაყობს თქვენით. გახსოვდეთ, თსსუ ყოველთვის მზად არის თქვენი მხარდაჭერისთვის. “ - აღნიშნა თსსუ-ის რექტორმა.
კურსდამთავრებულებს, ასევე, სიტყვით მიმართა მედიცინისა და სტომატოლოგიის საერთაშორისო ფაკულტეტის დეკანმა ასოცირებულმა პროფესორმა დავით თოფურიამ.
,,ეს არის დღე, რომელიც ყოველთვის განსაკუთრებული იქნება თქვენთვის. ეს არის ახალი დასაწყისი. დარმუნებული ვარ თქვენს არაერთ მიღწევას გავიგებთ. გილოცავთ ამ დღეს და გისურვევთ წარმატებებს“.
ცერემონია დასრულდა საზეიმო ფიცის დადებით – მომავალი პროფესიული საქმიანობისადმი ერთგულების, თავდადებისა და ეთიკური სტანდარტების დაცვის პირობით.
თბილისის სახელმწიფო სამედიცინო უნივერსიტეტი ამაყობს თავისი კურსდამთავრებულებით. თსსუ ულოცავს ყველა კურსდამთავრებულს და წარმატების სურვილით აცილებს მათ მომავალ პროფესიულ გზაზე – გზაზე, რომელიც ადამიანების დახმარებასა და მათზე ზრუნვაზეა აგებული.
