თსსუ-ის ფარმაციის ფაკულტეტის სამაგისტრო პროგრამის – „ფარმაცევტული ანალიზი“ – სტუდენტები, მარიამ ფირანიშვილი და ნიკოლოზ ვარსემაშვილი, ევროკავშირის საგრანტო პროგრამის (ERASMUS+) ფარგლებში, ლიეჟის უნივერსიტეტში, იმყოფებოდნენ.
სტუდენტებმა წარმატებით გაიარეს ფარმაცევტული ანალიზის სასწავლო-პრაქტიკული კურსი. იმავე პერიოდში ჩაერთნენ ერთობლივ სამაგისტრო კვლევით პროექტში. მათი ნაშრომები ეხებოდა საქართველოში მზარდი მცენარეების: გვარი Rubus-ის და გვარი Allium-ის ზოგიერთი სახეობის მეორადი მეტაბოლიტების ქიმიასა და ბიოლოგიურ აქტივობას.
კვლევითი პროექტის პრაქტიკული ნაწილი წარიმართა ორი უნივერსიტეტის ერთობლივი ხელმძღვანელობით — საქართველოს მხრიდან პროექტს კურირებდა თსსუ-ის ფარმაკოგნოზიის დეპარტამენტის პროფესორი ლაშა მსხილაძე, ხოლო ბელგიის მხრიდან — ლიეჟის უნივერსიტეტის ფარმაკოგნოზიის კათედრის პროფესორი მიშელ ფრედერიში.
სამაგისტრო ნაშრომების ფარგლებში ჩატარდა მცენარეული საკვლევი ნედლეულის — Allium atroviolaceum, A. erubescens, A. fuscoviolaceum, A. gracilescens, Rubus cyri და Rubus cartalinicus — ჯამური ექსტრაქტების ფიტოქიმიური ანალიზი, ქიმიური შემადგენლობის შესწავლა თხელფენოვანი ქრომატოგრაფიის მეთოდით, ასევე ბიოლოგიური აქტივობის პირველადი შეფასება სიმსივნისა და მალარიის საწინააღმდეგო აქტივობის შესწავლა.
